Azərbaycan, Bakı, 5 iyun /Trend, müxbir Ə.Həsənov/
Azərbaycan turistlərinin ənənəvi səfər istiqamətlərinin Türkiyə, Avropa ölkələri və BƏƏ olmasına baxmayaraq, Cənub-Şərqi Asiyaya, eləcə də Maldiv və Seyşel adalarına maraq tədricən artır. Bu barədə çərşənbə axşamı Trend-ə Mədəniyyət və Turizm Nazirliyinin şöbə müdiri Aydın İsmiyev bildirib.
Onun sözlərinə görə, azərbaycanlı turistlərin səfər coğrafiyası genişlənir.
"Bizim turistlər Türkiyəyə bu ölkənin yaxın olması səbəbindən gedirlər. Həm də dillə bağlı maneə yoxdur. Lakin hər il eyni ölkəyə getmək maraqlı olmadığından onlar yeni istiqamətlər seçirlər", - İsmiyev deyib.
Azərbaycanlı turistlərin Asiya ölkələrinə maraqlarının artması Şimali Afrika kurortlarının populyarlığının azalması ilə əlaqədardır.
"2011-ci ildə Azərbaycana 210 mindən çox turist gəlib. Xaricə isə 56 minə yaxın turist gedib", - İsmiyev bildirib.
Onun sözlərinə görə, Azərbaycanda xarici turistlərin marağına səbəb olan əsas istiqamətlər Qəbələ, İsmayıllı, Şəki, Quba, Qusar, Masallı, Lənkəran, Lerik və inkişaf etmiş infrastrukturun olduğu yerlərdir.
"Azərbaycana daha çox turist qonşu ölkələrdən, eləcə də Avropadan - Böyük Britaniyadan, Almaniyadan gəlir", - İsmiyev deyib.