Azərbaycan, Bakı, 2 iyul /Trend, müxbir E.İsmayılov/
"Azərbaycan Hava Yolları" QSC iyulda "Boeing 767-300ER" sərnişin təyyarəsi almağı planlaşdırır. Bu barədə bazar ertəsi Trend-ə QSC-dəki mənbə bildirib.
Onun sözlərinə görə, həmçinin, yaxın vaxtlarda Bakıya "Boeing 767" yük təyyarəsinin gəlişi gözlənilir.
"Yük təyyarələrindən birini artıq almışıq. İkincinin alınması sərnişin təyyarəsinin əldə edilməsi ilə eyni gündə gözlənilir", - mənbə qeyd edib.
QSC ötən ilin iyununda "Boeing" ilə müqavilə çərçivəsində "Boeing 767-300ER" markalı sərnişin təyyarəsini alıb.
QSC Mərkəzi Asiyada ilk dəfə olaraq, artıq 2014-cü ildən "Boeing-787 Dreamliner" ən müasir təyyarələrini (iki ədəd) almağa başlayacaq.
Bu, AZAL-a daha uzaq məsafələrə, xüsusən Cənubi və Şimali Amerika, Cənub-Şərqi Asiya və dünyanın digər regionlarına reysləri həyata keçirməyə imkan verəcək.
