Azərbaycan, Bakı, 4 iyul /Trend, müxbir A.Axundov/
2012-ci ilin may ayı ərzində Azərbaycanın bank sektorunun kapitallaşması 1,49 faiz artıb. Kapitallaşma 2011-ci ilin mayına nisbətən 2,73 faiz azalaraq 2012-ci il iyunun 1-nə 2187,2 milyon manat təşkil edib. Trend-in məlumatına görə, bu barədə çərşənbə günü Azərbaycan Mərkəzi Bankının (AMB) statistik hesabatında qeyd edilir.
AMB-nin məlumatına görə, kapitalı 10 milyon manatdan çox olan bankların sayı may ayının yekunları üzrə 42 ədəd təşkil edib. Bu göstərici əvvəlki aylara nisbətən dəyişməz qalıb, 2011-ci ilin may ayı ilə müqayisədə isə 1 ədəd artıb.
Ölkənin bütün banklarının ümumi kapital həcmində bu kateqoriyadan olan bankların xüsusi çəkisi apreldə olduğu kimi, may ayında da 99,5 faiz təşkil edib. 2011-ci il iyunun 1-də isə 98,9 faiz olub.
Hazırda kapitallaşma (minimum kapital 10 milyon manat təşkil etməlidir) üzrə AMB-nin tələblərini iki bank yerinə yetirmir. Bir bankın (xüsusi çəkisi 0,3 faiz) kapitalı 5-10 milyon manat, digərinin (0,2 faiz) isə 3,5-5 milyon manat çərçivəsində formalaşıb.
