Azərbaycan, Bakı, 27 sentyabr /Trend, müxbir A.Axundov/
Niderland şirkətləri Azərbaycanda kənd təsərrüfatı sahəsindəki layihələrdə iştirakını genişləndirir. Trend-in məlumatına görə, bu barədə cümə axşamı jurnalistlərə Niderlandın Azərbaycandakı səfiri Aryen Uyterlinde deyib.
"Kənd təsərrüfatında böyük potensialı olan Azərbaycan bu sahədə zəngin təcrübəyə malik Niderland üçün maraqlı tərəfdaşdır. Son vaxtlar bu sahədə əməkdaşlığın inkişaf etdiyini müşahidə edirik", - Uyterlinde qeyd edib.
Onun sözlərinə görə, artıq süd məhsulları istehsalı, istixanaların salınması, habelə kənd təsərrüfatı sahəsində təşkil üzrə konkret layihələr reallaşdırılır.
"Xüsusən, "Azərsun Holdinq" və Niderland şirkətlərinin istixanaların salınması üzrə birgə layihələri mövcuddur. Biz yerli sahibkarların Niderland şirkətləri ilə işə böyük marağını müşahidə edirik", - Uyterlinde bildirib.
Səfirin sözlərinə görə, Niderland sahibkarlarının bu yaxınlarda Azərbaycana səfəri bu sahələrdə birgə biznesin inkişaf etməsində böyük rol oynayıb.