Azərbaycan, Bakı, 9 oktyabr /Trend, müxbir A.Axundov/
Azərbaycan Mərkəzi Bankı (AMB) 2013-cü ildə ölkədə ödəniş kartları bazarının artım dinamikasının yüksələcəyini proqnozlaşdırır. Bu barədə çərşənbə axşamı Trend-ə AMB-nin baş direktoru Rəşad Orucov deyib.
"Hazırda bazarın artım tempi çox yaxşıdır. Bu gün təqdim edilən xidmətlərin sayı və keyfiyyəti üzrə dinamika da çox yaxşıdır. Gələn il vəziyyət daha da yaxşı olacaq", - Orucov bildirib.
Onun sözlərinə görə, hazırda banklar plastik kartlar üzrə yeni məhsullar və xidmətlər təklif edirlər.
"Yeni layihələr reallaşdırılır. Banklar və istehlakçılar tərəfindən maraq böyükdür. Bazarın perspektivləri çox böyükdür. İnsanların gəlirləri baxımından imkanları artıq bu məshullardan fəal istifadə etməyə şərait yaradır", - Orucov vurğulayıb.
Onun sözlərinə görə, bankların yeni məhsullar təqdim etməsi ilə kredit kartlarından istifadə genişlənəcək. Hərçənd ki, bu gün bazarın böyük hissəsi debet kartların payına düşür.
