Türkiyə, İstanbul, 12 oktyabr /Trend, xüsusi müxbir İ.Xəlilova/
Özəl Sektorun İnkişafı üzrə İslam Korporasiyası (ICD) Azərbaycanda yaradılan ilk islam sığorta şirkəti "Takaful Company"nin kapitalında 33 faizədək iştirak payı əldə etməyə hazırdır. Bu barədə cümə günü Trend-ə Tərəfdaşlıq Departamentinin Şərqi Avropa və MDB ölkələri bölməsinin (Head Division Eastern Europe & CIS Coverage & Partnerships Department) rəhbəri Murad Yandiyev deyib.
Azərbaycanda sığorta şirkətinin yaradılmasına dair danışıqlar "Amrahbank" ilə aparılır.
"Tərəfimizdən ilkin kapitalı təqribən 6,2 milyon dollar olan sığorta şirkətinin açılması bəyənilib, lakin Azərbaycan tərəfində mövcud proses ləng gedir", - Yandiyev qeyd edib.
Onun sözlərinə görə, bu, MDB məkanında ICD-nin ilk sığorta şirkəti olacaq. İndiyədək korporasiya investisiya və lizinq şirkətləri, islam bankları yaradıb. Korporasiyanın iştirakı ilə Azərbaycanda həmçinin "Caspian International Investment Company" (CIIC), "Ansar Leasing" lizinq şirkəti fəaliyyət göstərir.
"Hazırda Qazaxıstanda lizinq şirkəti yaradırıq, bizdə İslam bankları Maldiv adalarında və Afrikada fəaliyyət göstərir", - Yandiyev vurğulayıb.