Azərbaycan, Bakı, 14 noyabr /Trend, müxbir A.Axundov/
2012-ci ilin yanvar-sentyabr ayları ərzində Azərbaycan banklarının öhdəlikləri 15,5% artaraq (1 830 mln. manat) dövrün sonuna 13 658,4 mln. manat təşkil edib. Trend-in məlumatına görə, bu barədə Azərbaycan Mərkəzi Bankının 2012-ci ilin yanvar-sentyabr ayları üzrə maliyyə sabitliyi icmalında deyilir.
2012-ci ilin hesabat dövrü ərzində bank sisteminin resurs bazası əsasən daxili bazardan cəlb edilmiş vəsaitlər hesabına artıb.
Hesabat dövrü ərzində bankların ümumi depozitləri 6,7% artaraq 10 080,6 mln. manata çatıb və cəmi öhdəliklərin 73,8%-ni təşkil edib.
Cari ilin 9 ayında əhalinin əmanətləri 10,6% artıb və 4556,3 mln. manata çatıb, bankların öhdəliklərində payı isə dövrün sonuna 33,3% olub.
Qeyri-rezident banklardan və beynəlxalq maliyyə təşkilatlarından cəlb edilmiş vəsaitlərin həcmi 2 448,2 mln. manat olub. Xaricdən cəlb olunmuş vəsaitlərin səviyyəsi məqbul səviyyədə olub və cəmi öhdəliklərin 18%-ni təşkil edib.
2012-ci ilin ötən dövrü ərzində əhalidən cəlb edilmiş əmanətlərin müddət strukturunda müsbət meyillər davam edib. Müddətli əmanətlər 286,5 mln. manat, tələb edilənədək əmanətlər isə 150 mln. manat artıb. Müddətli əmanətlərin cəmi əmanətlərdə payı cari ilin sentyabr ayının sonuna 78,2% olub.
Əhalinin bank sisteminə inamının artması nəticəsində uzunmüddətli və milli valyutada əmanətlərin artımı müşahidə olunub. Hesabat dövrü ərzində uzunmüddətli əmanətlər 10,5% artaraq cəmi əmanətlərin 36%-ni təşkil edib. 2012-ci ilin doqquz ayı ərzində milli valyutada əmanətlər 14,6% artaraq 2616 mln. manata çatıb və cəmi əmanətlərin 57%-ni təşkil edib.
Azərbaycan bank sistemi hesabat dövründə də qeyri-rezident fiziki şəxslər üçün cəlbedici olub. Belə ki, 2012-ci ilin yanvar-sentyabr ayları ərzində qeyri-rezident fiziki şəxslər tərəfindən yerləşdirilmiş əmanətlərin həcmi 19,6% artıb (ötən ilin müvafiq dövrünə nisbətən 40%) və cəmi əmanətlərin 10%-ni təşkil edib.
Hüquqi şəxslərin depozitlərində artım müşahidə olunur. Hüquqi şəxslərin depozitləri son bir ildə 15,4% artıb və 5 524,3 mln. manat təşkil edib.
