Azərbaycan, Bakı, 16 noyabr /Trend, müxbir C.Nəsibova/
Market-meyker institutunun formalaşması Azərbaycanda qiymətli kağızlar bazarının sonrakı inkişafını irəli çəkəcək. Trend-in məlumatına görə, bu barədə Bakı Fond Birjasının (BFB) idarə heyətinin sədri Emin Əliyev cümə günü "Bakı Fond Birjasında market-meyker institutunun fəaliyyəti və onlara yaradılan imkanlar" mövzusunda keçirilən konfransda jurnalistlərə deyib.
Onun sözlərinə görə, "2011-2020-ci illərdə Qiymətli kağızlar bazarının inkişafı üzrə Dövlət Proqramı"nın əsas istiqamətlərindən biri maliyyə bazarında tələb və təklifin stimullaşdırılmasıdır və market-meyker institutunun formalaşması bu istiqamətdə əhəmiyyətli addım olacaq.
"Hazırda artıq rəsmi market-meyker statusunun əldə edilməsinə marağı olan tərəflər mövcuddur", - Əliyev deyib.
Tədbirdə Azərbaycan Mərkəzi Bankının, Qiymətli Kağızlar üzrə Dövlət Komitəsinin, Maliyyə Nazirliyinin, Milli Depozit Mərkəzinin, "Pasha Holding" və başqa qurumların nümayəndələri iştirak ediblər.
BFB-nin Müşahidə Şurası avqustun 15-də market-meyker fəaliyyətinin daxili qaydalarını təsdiqləyib. Həmin qaydalar institutun yaradılmasını və onun fəaliyyətinin nizama salımasını nəzərdə tutur.