Azərbaycan, Bakı, 20 fevral /Trend, müxbir A.Tağıyeva/
Azərbaycan və Türkiyə investorlarının üçüncü ölkələrə birgə investisiya yatırmalarının vaxtı çatıb. Bu barədə Trend-ə Türkiyənin Azərbaycandakı səfiri İsmayıl Alpər Coşqun deyib.
"Türkiyə və Azərbaycan birgə investisiyalar sahəsində səylərini artırmalıdırlar. Azərbaycan və Türkiyə investorları üçüncü ölkələrə birgə investisiya yatırmağa başlamalıdırlar", - Coşqun bildirib.
Səfirin sözlərinə görə, Azərbaycan və Türkiyənin birgə layihələri dünya iqtisadiyyatına əhəmiyyətli təsir edəcək. Nümunə qismində Bakı-Tbilisi-Qars dəmiryol magistralı layihəsini göstərmək olar. Bu dəmiryolun "Mərmərə" layihəsi vasitəsilə Əfqanıstan, Mərkəzi Asiya və Avropanın dəmiryol layihələrinə qoşulmasını nəzərə aslsaq, layihə dünya miqyaslı əhəmiyyət qazanır.
Səfirin sözlərinə görə, Türkiyə və Azərbaycan arasında iqtisadi münasibətlər olduqca yaxşı səviyyədədir. 2012-ci ilin yekunları üzrə ölkələr arasında əmtəə dövriyyəsi 4,2 milyard dollar təşkil edib.
"Ölkələr arasında iqtisadi münasibətlər yaxşı səviyyədə olsa da, hesab edirəm ki, bu rəqəmlər reallıqda olan əməkdaşlığın potensialını əks etdirmir. Ölkələr mövcud potensiala çatmaq üçün səylər göstərməlidirlər", - Coşqun qeyd edib.
"İki ölkə arasında əməkdaşlığın əsas sahələri arasında enerji və nəqliyyat sektorları seçilir. Enerji sahəsində əməkdaşlığın nümunələri həyata keçirilməsi yaxın gələcəkdə planlaşdırılan Trans-Anadolu (TANAP) qaz kəməri kimi uğurla reallaşdırılan layihələrdir. Bundan başqa, Azərbaycan Respublikası Dövlət Neft Şirkətinin (ARDNŞ) Türkiyəyə, o cümlədən İzmirdəki "Star" neft emalı zavoduna, Aliağa kompleksində limanın tikintisinə və digər sahələrə investisiya qoyuluşları nümumə kimi göstərilə bilər", - səfir qeyd edib.
Həmçinin, Naxçıvandan Türkiyənin İğdır ərazisinə dəmiryol tikintisi layihəsi nəzərdən keçirilir.
"Hazırda hər bir ölkə öz ərazisində işlər aparır. İlkin işlər başa çatdıqdan sonra Türkiyə və Azərbaycan bu layihənin həyata keçirilməsi üçün birgə fəaliyyətə keçəcəklər", - diplomat bildirib.
Coşqunun sözlərinə görə, iqtisadi tərəfdaşlıqdan əlavə, hər iki ölkə beynəlxalq arenada sıx əməkdaşlıq edir ki, bu da Türkiyə və Azərbaycan rəhbərlərinin apardığı siyasətin nəticəsidir.
"İki ölkə arasında möhkəmlənən əlaqələrin üçüncü sahəsi Türkiyə investorlarının Azərbaycan iqtisadiyyatına artan marağı, həmçinin Türkiyə iqtisadiyyatında Azərbaycanın özəl sektorunun mövqeyinin möhkəmlənməsidir. Sadalanan bütün aspektləri nəzərə alaraq, əminliklə demək olar ki, əmtəə dövriyyəsi, qarşılıqlı investisiyalar və nəticədə Azərbaycan və Türkiyənin iqtisadi tərəfdaşlığı gələcəkdə də inkişaf edəcək", - səfir bildirib.
Səfir, həmçinin bildirib ki, cari ildə Türkiyə və Azərbaycan arasında Strateji Tərəfdaşlıq Şurasının keçirilməsi gözlənilir. Lakin Şuranın keçirilmə tarixi və yeri hələlik məlum deyil.
Səfirin sözlərinə görə, Türkiyə investorları üçün Azərbaycanda durmadan inkişaf edən kənd təsərrüfatı, tikinti və turizm sahələri daha cəlbedici olaraq qalır. Ərazisinin nisbətən kiçik olmasına baxmayaraq, Azərbaycan qeyri-adi təbiətə və iqlimə malikdir ki, bu da ölkəni turistlər üçün cəlbedici edir.
O qeyd edib ki, sadalanan sahələrdən başqa, ölkələr, həmçinin telekommunikasiya sahəsində uğurla əməkdaşlıq edirlər. Türkiyənin bu sahədə zəngin təcrübəsi var və Azərbaycan ilə əməkdaşlıqda ölkə bu sahədə bir sıra layihələr həyata keçirə bilər.
Öz növbəsində, Azərbaycan investorlarını Türkiyənin turizm, elektron sənayesi və enerji sahəsi maraqlandıra bilər.
