Azərbaycan, Bakı, 10 iyul /Trend, müxbir E.İsmayılov/
Azərbaycan Respublikası Dövlət Neft Şirkəti (ARDNŞ) 2013-cü il sentyabrın 20-də Bakının Qaradağ rayonunda yeni gəmiqayırma zavodunu istismara verməyi planlaşdırır. Bu barədə çərçənbə günü jurnalistlərə ARDNŞ prezidenti Rövnəq Abdullayev deyib.
Onun sözlərinə görə, hazırda yeni gəmiqayırma zavodunun açılışını və bu müəssisədə tikilmiş ilk kiçik gəminin istismara verilməsini eyni vaxtda həyata keçirmək üçün aktiv işlər aparılır.
Abdullayev qeyd edib ki, ARDNŞ-dən başqa, BP, Azərbaycan Dövlət Xəzər Dəniz Gəmiçiliyi də bu zavodda gəmilərin tikilməsini sifariş veriblər: "Həmçinin hərbi təyinatlı gəmilərin tikintisi üçün sifarişlər var".
ARDNŞ prezidenti deyib ki, hazırda gəmiqayırma zavodunun 10 il müddətinə hesablanmış perspektivli fəaliyyət planının hazırlanması üzrə işlər aparılır.
