Azərbaycan, Bakı, 2 avqust /Trend, müxbir A.Axundov/
Azərbaycan Mərkəzi Bankı (AMB) ölkənin bank sektorunun birləşməsi prosesini "sağlam" hesab edir və narahatlıq üçün heç bir əsas görmür. Trend-in məlumatına görə, bu barədə cümə günü mətbuat konfransında AMB-nin İdarə heyətinin sədr müavini Xaqani Abdullayev bildirib.
Hazırda ölkə bankları 10 milyon manatdan aşağı olmayan nizamnamə kapitalına malik olmalıdırlar, lakin 2014-cü il yanvarın 1-dən AMB-nin 50 milyon manat həcmində yeni tələbi qüvvəyə minir.
Abdullayev deyib ki, hazırda sektorun aktivlərinin 75 faizinə sahib olan bankların kapitalları yeni tələbə cavab verir: "Kapitallaşma prosesi davam edir. Biz ciddi problem görmürük".
Onun sözlərinə görə, AMB kapitalını yeni tələbədək artıra bilməyən bankların qeyri-bank kredit təşkilatlarına çevrilməsini, yaxud birləşməsini təşviq edir.
