Azərbaycan, Bakı, 19 noyabr /Trend müxbir A.Axundov/
2013-ci ilin yanvar-oktyabr aylarında Azərbaycan ərazisindən nəqliyyat vasitələri ilə 33,5 milyon tondan artıq yük daşınıb ki, bu da əvvəlki ilin analoji göstəricisindən 3,98 faiz çoxdur. Trend-in məlumatına görə, bu barədə Azərbaycan Dövlət Gömrük Komitəsinin (DGK) hesabatında deyilir.
Bu dövr ərzində yük ixracatı 25,34 milyon ton, idxalatı isə 8,08 milyon ton təşkil edib.
İlk 10 ayda dəniz nəqliyyatı ilə 191 min ton, dəmir yolu ilə 2,32 milyon ton, avtomobil nəqliyyatı ilə 483,38 min ton, hava yolu ilə 53,55 min ton yük ixrac edilib, stasionar nəqliyyat vasitələri ilə daşınmalar isə 22,38 milyon ton olub.
Ölkəyə dəniz nəqliyyatı ilə 1,76 milyon ton, dəmir yolu ilə 4,72 milyon ton, avtomobil nəqliyyatı ilə 1,52 milyon ton, hava nəqliyyatı ilə 15,21 min ton yük gətirilib.
