Azərbaycan, Bakı, 25 dekabr /Trend, müxbir E.Əliyev/
Uzunmüddətli maliyyə mənbələrinin genişləndirilməsi məqsədilə özəl investorların ipoteka kreditləşməsi sisteminə cəlb edilməsi stratetji əhəmiyyət daşıyır. Trend-in məlumatına görə, bu barədə Mərkəzi Bankın 2014-cü il üçün pul və maliyyə sabitliyi siyasətinin əsas istiqamətləri barədə bəyanatında deyilir.
Bəyanatda bildirilir ki, qəbul olunacaq yeni strategiya çərçivəsində ölkə əhalisinin artan mənzil ehtiyaclarının ödənilməsi, uzunmüddətli və əlverişli ipoteka kreditləri hesabına mənzil əldə etmək imkanlarının genişləndirilməsi istiqamətində tədbirlər davam etdiriləcək: "Bu sahədə nümunəvi dünya təcrübələrindən yararlanmaqla müxtəlif, lakin effektiv inteqrasiya edilmiş mənzil təminatı formalarının işlənməsi və həyata keçirilməsi diqqətdə saxlanılacaq".
Bundan əlavə, dövlət-özəl biznes tərəfdaşlığı əsasında bazara ucuz, eyni zamanda, komfortlu mənzil təklifinin təmin edilməsi mənzil təminatının daha da yaxşılaşmasında mühüm əhəmiyyət kəsb edir:
"Digər tərəfdən isə əhalinin şəxsi yığımlarının mənzil təminatı məqsədləri üçün istifadəsini müxtəlif vasitələrlə stimullaşdırmaq yolu ilə əhalinin mənzil təminatında alternativ və tamamlayıcı yeni maliyyə mənbələrini formalaşdırmaq mümkündür. Bu məqsədlə əmanət-yaşayış-tikinti banklarının nümunəvi dünya təcrübələri əsasında inkişaf etdirilməsi mühüm prioritetlərdən biridir".
AMB-nin məlumatına görə, Azərbaycan İpoteka Fondu və kommersiya banklarının resursları hesabına ayrılan kreditlərin həcmi 750 milyon manat səviyyəsinə çatıb.
Bəyanatda qeyd edilir ki, 2013-cü il ərzində verilən ipoteka kreditlərinin həcmi 35 faiz, güzəştli kreditlərin həcmi isə 33 faiz artıb.
