Azərbaycan, Bakı, 29 yanvar /Trend, müxbir E.Əliyev/
2013-cü ildə Gürcüstandan Azərbaycana 47,57 milyon dollar dəyərində 19,09 min ton diri çəkiyə malik iribuynuzlu mal-qara idxal edilib. Trend-in məlumatına görə, bu barədə Gürcüstan Milli Statistika İdarəsinin hesabatında deyilir.
Hesabatda qeyd edilir ki, ötən il bu sahənin xüsusi çəkisi Gürcüstandan Azərbaycana ümumi ixracın həcminin 6,7 faizini təşkil edib.
2012-ci illə müqayisədə Gürcüstandan idxal olunan iribuynuzlu mal-qaranın idxalı 21,26 faiz, say etibarı ilə isə 52,19 faiz və ya 6,11 min ton artıb. Müqayisə üçün: 2012-ci ildə Gürcüstandan Azərbaycana 39,93 milyon dollar həcmində diri çəkisi 12,98 min ton olan iribuynuzlu mal-qara idxal edilib.
2013-cü ildə Gürcüstandan Azərbaycana 710,21 milyon dollar dəyərində mal ixrac edilib ki, bu da hesabat dövründə ölkə ixracının ümumi həcminin 24,4 faizini təşkil edir. 2012-ci illə müqayisədə Azərbaycana ixracat 13,3 faiz artıb. Müqayisə üçün: 2012-ci ildə Azərbaycana 626,85 milyon dollar dəyərində Gürcüstan mallları ixrac edilib.