Azərbaycan, Bakı, 13 mart /Trend, müxbir A.Axundov/
"Paşa Bank" Türkiyənin "TAIB Bank"ında pay əldə etməyə icazə almaq üçün bu ölkənin Bank Nəzarəti Qurumuna müraciət edib. Trend-in məlumatına görə, bunu jurnalistlərə bankın İdarə heyətinin üzvü Taleh Kazımov deyib.
Onun sözlərinə görə, "TAIB Bank" "Paşa Bank"ın törəmə bankı olacaq və adı dəyişdiriləcək: "Bankımız bu il Türkiyənin bank tənzimləyicisindən cavab alacağına ümid edir".
T.Kazımov qeyd edib ki, Azərbaycan iqtisadiyyatı artır və biznesi inkişaf edir: "Türkiyədə təqribən 5 min Azərbaycan şirkəti fəaliyyət göstərir. Biz biznesimizin arxasınca gedirik".
"TAIB Bank" 1979-cu ildə Bəhreyndə yaradılıb. 1987-ci ildən isə Türkiyədə fəaliyyət göstərir. Bankın Qazaxıstan, BƏƏ və ABŞ-da filialları var.
