Azərbaycan, Bakı, 17 may /Trend, müxbir E.Əliyev/
Manatın məzənnəsinin kəskin möhkəmlənməsinin qarşısını almaq və bununla da qeyri-neft sektorunun rəqabət qabiliyyətinə neqativ təsirləri aradan qaldırmaq üçün Mərkəzi Bank tərəfindən rüb ərzində 536 milyon dollar həcmində valyuta sterilizasiyası həyata keçirilib. Trend-in məlumatına görə, bu barədə bankın 2014-cü ilin yanvar-mart ayları üzrə pul siyasəti icmalında deyilir.
Hesabat dövrü ərzində valyuta bazarında xarici valyutanın təklifi tələbi üstələyib.
2014-cü ilin I rübü ərzində məzənnə siyasəti valyuta bazarında tələb və təklif arasında tarazlığın təmin olunmasına və bu əsasda manatın ABŞ dollarına qarşı məzənnəsinin sabitliyinə yönəldilib.
Rüb ərzində manatın ABŞ dollarına qarşı məzənnəsi demək olar ki, dəyişməyib və cəmi 0,03% möhkəmlənib. Milli valyutanın məzənnəsinin sabitliyi ölkədə makroiqtisadi mühitə və maliyyə sektorunun sabitliyinə müsbət təsir göstərib.
Manatın nominal ikitərəfli məzənnəsinin dinamikası real ikitərəfli məzənnələrin dəyişməsinə təsir göstərib. Belə ki, manatın ikitərəfli nominal və real məzənnələri Türkiyə, Rusiya, Ukrayna, Gürcüstan, Qazaxıstan, Çin və Cənubi Koreya milli valyutalarına nəzərən möhkəmlənib, Avrozona, Böyük Britaniya və Yaponiya milli valyutalarına nəzərən isə manat real olaraq ucuzlaşıb.
2014-cü ilin I rübü ərzində qeyri-neft sektoru üzrə nominal effektiv məzənnə (ümumi ticarət dövriyyəsi üzrə) 4,7% bahalaşıb. Aparılmış model qiymətləndirmələrə (hesablamalar VAR (Vektor Autoreqressiv) modelinin nəticəsinə əsaslanır) görə, NEM-in 1% möhkəmlənməsi istehlak qiymətlərini 0,28% bəndi azaldır.
Yanvar-mart aylarında qeyri-neft sektoru üzrə real effektiv məzənnə (REM) 4,7% möhkəmlənib. 2012-ci ilin əvvəlində REM 0,9 faiz ucuzlaşıb.
İnflyasiya fərqləri isə real effektiv məzənnəyə azaldıcı təsir edib. Beləliklə, hesabat ilində Mərkəzi Bank manatın ikitərəfli məzənnəsinin sabitliyini təmin edib. Manatın nominal çoxtərəfli məzənnəsi isə möhkəmlənib ki, bu da inflyasiya hədəfinə nail olunmasında müsbət rol oynayıb.