Azərbaycan, Bakı, 20 may /Trend, müxbir E.Əliyev/
2014-cü ilin yanvar-aprel aylarında Azərbaycanda həyat sığortası sahəsində fəaliyyət göstərmək hüququna malik üç şirkət - "Paşa Həyat", "Atəşgah Həyat" və "Qala Həyat" həyat sığortasının bütün növləri üzrə 40,82 milyon manat vəsait toplayıb ki, bu da ötən ilin eyni dövrünün göstəricisini 53 faiz üstələyir. Trend-in məlumatına görə, bu barədə Azərbaycan Maliyyə Nazirliyinin 2014-cü ilin yanvar-aprel aylarında sığorta şirkətlərinin fəaliyyəti haqqında hesabatında deyilir.
Hesabata görə, ölkədə fəaliyyət göstərən sığorta şirkətlərinin yığımlarının ümumi həcmində həyat sığortası üzrə haqların payı 27,31 faiz təşkil edib.
Ödənişlər də artıb: 2014-cü ilin yanvar-aprel aylarında 2,39 milyon manat məbləğində ödəniş həyata keçirilib ki, bu da ötən ilin eyni dövrünün göstəricisindən 73,19 faiz çoxdur. Bu ödənişlərin xüsusi çəkisi sığorta bazarının ümumi ödənişlərində 5,4 faiz təşkil edib.
2014-cü ilin yanvar-aprel ayları ərzində şirkətlər istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə 13,08 milyon manat vəsait toplayıblar. Bu, ötən ilin eyni dövrünün göstəricisindən 4,98 faiz çoxdur.
Könüllü həyat sığortası üzrə yığımlar il ərzində 95,08 faiz artaraq 27,74 milyon manata çatıb. Könüllü həyat sığortası seqmentində yığımların böyük hissəsi yaşam sığortasının (12,75 milyon manat) payına düşüb, qalan hissə isə ölüm (1,46 milyon manat) və sağalmaz xəstəliklərdən (8,65 min manat) sığortanın hesabına təmin olunub.
Yanvar-aprel aylarında həyat sığortasının könüllü növləri üzrə 1,68 milyon manat, icbari növləri üzrə isə 0,82 milyon manat məbləğində ödənişlər aparılıb.
2014-cü ilin yanvar-aprel aylarının yekunları üzrə ölkədə fəaliyyət göstərən şirkətlərin sığorta haqlarının ümumi həcmi 149,48 milyon manat (il ərzində artım 7,76 faiz), ödənişlər isə 44,22 milyon manat (il ərzində artım 15,73 faiz) olub.
Maliyyə Nazirliyinin hesabatında AzRE təkrar sığorta şirkətinin fəaliyyətinin yekunları göstərilməyib.
