Azərbaycan, Bakı, 23 may /Trend, müxbir E.Əliyev/
Gürcüstan 2014-cü ilin yanvar-aprel aylarında Azərbaycandan 203,53 milyon dollar dəyərində məhsul idxal edib. Trend-in məlumatına görə, bu barədə Gürcüstanın Milli Statistika Xidmətinin xarici ticarət haqqında hesabatında deyilir.
Hesabata əsasən, qeyd edilən dövrdə Azərbaycandan Gürcüstana idxalın həcmi il ərzində 7,94 faiz artıb. Müqayisə üçün, 2013-cü ilin ilk 4 ayında Gürcüstan 188,55 milyon dollar dəyərində Azərbaycan məhsulu idxal edib.
Azərbaycan Gürcüstanın məhsul idxal etdiyi ölkələrin siyahısında üçüncü yerə düşüb. Gürcüstana gətirilən malların ümumi həcmində Azərbaycan ixracının xüsusi çəkisi 8,1 faiz təşkil edir.
Gürcüstan ən çox məhsulu Türkiyədən idxal edir. Bu ilin ilk 4 ayında Gürcüstanın Türkiyədən idxalı 452,6 milyon dollar və ya idxalın ümumi həcminin 18 faizini təşkil edib. Çin 214,31 milyon dollarla və Gürcüstan idxalının ümumi həcminin 8,5 faiz xüsusi çəkisi ilə ikinci yeri tutur.