...

Ekspert: Azərbaycanda yol qəzaları üzrə sığorta ödənişlərinin müddəti azaldılmalıdır

Biznes və iqtisadiyyat xəbərləri Materials 27 May 2014 17:30 (UTC +04:00)

Trend-i buradan izləyin

Azərbaycan, Bakı, 27 may /Trend, müxbir E.Əliyev/

Azərbaycanda vətəndaşların yol-nəqliyyat hadisəsi nəticəsində sığorta halları üzrə almalı olduğu ödənişlərin verilməsi müddəti azaldılmalıdır. Bunu Trend-ə Azərbaycan Sığortaçılar Assosiasiyasının (ASA) sədri Orxan Bayramov deyib.

Onun sözlərinə görə, zərərin həcmindən və digər prosedurlardan asılı olaraq, hazırda bu göstərici orta hesabla 1-3 ay arasında dəyişir: "Biz bu müddətin ən azı 30 günədək azaldılmasında təkid edirik ki, bu da istehlakçıların avtomobil sığortasına marağını daha da yüksəldəcək".

ASA hazırda KASKO üzərində fəal iş aparır, çünki sığortanın bu növü üzrə yığımların həcminin azalması il ərzində artıq 20 faizi ötür.

O.Bayramov qeyd edib ki, belə enişin əsas səbəbi Azərbaycan Mərkəzi Bankının avtomobil krediti üzrə şərtləri sərtləşdirməsidir: "Bu, avtonəqliyyat vasitələrinin mülki məsuliyyətinin icbari sığortasına da təsir edib. Avtomobillərin alış-satış prosesinin yubanması səbəbindən bu həm də qismən KASKO-ya təsir edir. Əgər sürücülər əvvəllər hər il, bəzən isə 1,5-2 ildən sonra avtomobilləri dəyişdirirdisə, hazırda prosesin çətinliyinə görə bu müddətin 4 ilədək uzanması müşahidə edilir. Buna görə də avtonəqliyyat vasitələrinin mülki məsuliyyətinin icbari sığortası alınmır ki, bu da avtomatik olaraq KASKO-ya təsir edir".

Əmlakın könüllü sığortası üzrə yığımların strukturunda böyük hissəni avtonəqliyyat vasitələrinin sığortası üzrə haqlar (8,75 milyon manat ödəniş olmaqla 11,45 milyon manat) təşkil edib.

O bildirib ki, könüllü sığortanın inkişafı sığortaçıların marağındadır: "Bu baş verməsə, o zaman böhran olmasa belə, 2-3 ildən sonra avtonəqliyyat vasitələrinin mülki məsuliyyətinin icbari sığortası ziyanlı olacaq. Hazırda sığorta bazarında məhsul çeşidinin genişlənməsi tendensiyası müşahidə olunur ki, bu da müştərilər uğrunda mübarizənin davam etdirilməsi məqsədilə şirkətlərin məcburi addımıdır. Məsələn, Avropanın bəzi ölkələrində yol-nəqliyyat hadisəsi zamanı şirkətlər müştəriyə başqa maşın verir. Buna Azərbaycanda bəzi sığortaçılar, o cümlədən "Bakı Sığorta" əl atır. Bu şirkət digərləri ilə yanaşı, bankların avtomobil krediti üzrə şərtləri sərtləşdirməsi səbəbindən böyük itkilər verib. Buna görə də bu istiqamətdə fəal işləyirlər və yeni xidmətlər, məhsullar tətbiq etməyə çalışırlar".

Məqalədə:
Xəbər lenti

Xəbər lenti