Azərbaycan, Bakı, 13 avqust/Trend, müxbir Emil İsmayılov/
Gəncədə tikilməsi planlaşdırılan vaqonqayırma zavodunun gücünü müəyyənləşdirmək məqsədilə İsveçrənin "Stadler" şirkəti "Azərbaycan Dəmir Yolları" QSC üçün lazım olan vaqonların sayı ilə bağlı məlumat toplayır. Bu barədə çərşənbə günü Trend-ə QSC-dən deyiblər.
QSC-dən qeyd ediblər ki, yataq və oturacaq yerli vaqonların sayı və növü ilə bağlı sifarişlərin qəbulu üzrə işlər aparılır: "Bu, istehsalın qurulmasının məqsədəuyğunluğunu və müəssisənin gücünü müəyyənləşdirməyə imkan verəcək".
QSC-dən deyiblər ki, yeni vaqonqayırma müəssisəsinin yaradılması çox önəmlidir: "Çünki bu, vaqonların istehsalı ilə yanaşı, onların ölkədə əsaslı təmirini həyata keçirməyə imkan verəcək".
Mənbənin sözlərinə əsasən, hazırda ölkədə vaqonların əsaslı təmirini təmin etməyə imkan verən müəssisə yoxdur və bu baxımdan mövcud prosesin qurulması üçün vaqonqayırma zavodunun açılması çox vacibdir.