Azərbaycan, Bakı, 3 sentyabr /Trend, müxbir Səbinə Əhmədova/
Hazırda Azərbaycanda sənayeləşmə prosesinin getməsi çox önəmlidir. Bu sənayeləşmənin nəticəsi olaraq, Azərbaycan müəssisələrinin inkişaf qabiliyyəti daha da artacaq və bu da imkan verəcək ki, Almaniyada da əlavə sərmayələr yatıra bilsinlər. Bunu Trend-ə açıqlamasında Alman-Azərbaycan Forumunun idarə heyətinin sədri, Alman Mərkəzi Sənətkarlar Birliyinin keçmiş baş katibi, sabiq dövlət katibi Hans-Eberhard Şlayer bildirib.
Onun sözlərinə görə, Azərbaycanda Kimya Sənaye Parkı yaranır ki, bu da səneyeləşmənin tərkib hissəsi olaraq qəbul olunur: "Burada qazanılan təcrübə və şirkətlərin investisiya qabiliyyətinin artması imkan verəcək ki, şirkətlər bu sahədə də Almaniyada fəaliyyət göstərsinlər".
H.E.Şlayer qeyd edib ki, Azərbaycan iqtisadiyyatı rəqabətə davamlı bir iqtisadiyyatdır: "Bu da bazar iqtisadiyyatında çox önəmli bir faktordur ki, Azərbaycan iqtisadiyyatı rəqabət qabiliyyətliliyini təmin edib. Bunun da əsasında akademik təhsillə yanaşı, peşə təhsili dayanır. Peşə təhsilinin olması sabit sənayeləşmənin yaradılması üçün çox vacibdir".
Onun sözləriə görə, Almaniya iqtisadiyyatının kökündə dayanan əsasən böyük şirkətlər deyil: "Bunlar əsasən orta və kiçik miqyaslı şirkətlərdir. Orta və kiçik şirkətlərin də texniki və akademik uğurunun kökündə, yeni iş yerlərinin yaranmasında iki məsələ dayanır. Birincisi, onların çevik fəaliyyəti, yəni bazar şəraitinə uyğunlaşması, ikincisi isə onların peşə təhsili sahəsində mütəxəssislər hazırlaya bilməsi. Bu iki amilin təmərküzləşməsi bizim iqtisadi uğurumuzu təşkil edir. Biz həmin təcrübəni sizin ölkənizlə bölüşmək istəyirik".
Alman-Azərbaycan Forumunun idarə heyətinin sədri bildirib k, Azərbaycan resurslarla zəngin olan bir ölkədir və bu sahədə daha çox inkişaf əldə edib.
O, qeyd edib ki, enerji təchizatı çox vacib məsələdir: "Bu sahədə növbəti illərdə böyük sərmayə qoymaq şansları yaranır".
H.E.Şlayer deyib ki, hər bir dövlətdə iqtisadi sabitlik siyasi sabitlik olmadan mümkün deyil: "Hər bir davamlı iqtisadi sabitliyin kökündə siyasi sabitlik dayanır. Bu mənada buradan aldığımız ismarışları özümüzlə Berlinə aparacağıq və bildirəcəyik ki, Azərbaycan dövlətinə, bu respublikaya öz inkişafı yolunda hansı sahədə dəstək lazımdır və federal dövlətdən gözlənilən siyasi dəstək nədən ibarətdir. Bu sahədə son günlər apardığımız fikir mübadiləsi və çıxardığımız nəticələrlə geri dönəcəyik".
Qeyd edək ki, Alman-Azərbaycan Forumunun İdarə Heyətinin sədri, Alman Mərkəzi Sənətkarlar Birliyinin keçmiş baş katibi, sabiq dövlət katibi Hans-Eberhard Şlayerin, Bundestaqın deputatı, Almaniya-Cənubi Qafqaz parlament qrupunun rəhbəri Karin Ştrentsin, "Almaniya-İsrail Cəmiyyəti"nin sədri Raynold Robbenin, Alman-Azərbaycan Forumunun baş katibi, keçmiş dövlət katibi Mixael Andreas Butsun və "Almaniya İqtisadiyyatının Şərq Komitəsi"nin icraçı direktoru Rayner Lintnerin daxil olduğu Almaniya nümayəndə heyəti Azərbaycanda səfərdədir.
Nümayəndə heyəti səfər çərçivəsində bir sıra dövlət qurumları ilə görüşlər keçirib.
