Azərbaycan, Bakı, 15 sentyabr /Trend, müxbir Azad Həsənli/
Dövlət Gömrük Komitəsi (DGK) cari ilin yanvar-avqust aylarında xarici ticarət əməliyyatlarının ötən ilin analoji dövrü ilə müqayisədə 9,19 faiz azaldığını açıqlayıb. Trend-in məlumatına görə, bu barədə Komitənin hesabatında deyilir.
Bu dövr ərzində Azərbaycan 139 ölkə ilə ticarət əməliyyatı aparıb. Hesabata görə, Azərbaycanın ümumi ticarət dövriyyəsinin həcmi 20,96 milyard dollar təşkil edib. Xarici ticarət əməliyyatlarında 9,737 milyard dollardan çox müsbət saldo yaranıb.
Ötən ilin analoji dövründə xarici ticarət profisiti 8,822 milyard dollar, 2014-cü ilin avqust ayında isə 1,373 milyard dollar olub.
Hesabatda bildirilir ki, bu dövr ərzində ölkənin xarici ticarət əməliyyatlarında 5036 hüquqi və fiziki şəxs iştirak edib ki, onlardan 3247-si hüquqi, 1789-u isə fiziki şəxsdir.
Yanvar-avqust aylarında 15,35 milyard dollar həcmində ixrac əməliyyatları həyata keçirilib ki, bu da ötən ilin analoji dövrünün göstəricisindən 3,78 faiz azdır. İxrac əməliyyatlarında dövlət sektorunun payı 14,476 milyard dollar, özəl sektor - 749,7 milyon dollar, fiziki şəxslərin payı isə 124,518 milyon dollar olub.
Yanvar-avqust aylarının yekununa görə, idxal 5,61 milyard dolları ötüb ki, bu da 2013-cü ilin analoji dövründə qeydə alınan göstəricidən 21,29 faiz azdır. İdxal əməliyyatlarında dövlət sektorunun payı 1,377 milyard dollar, özəl sektorun payı isə 4,01 milyard dollar olub.
Cari ilin yanvar-avqust aylarında Azərbaycandan 1792 adda məhsul ixrac, 5579 adda məhsul isə idxal olunub.
