...

Azərbaycanda 2,3 milyon tondan çox taxıl istehsal olunub

Biznes və iqtisadiyyat xəbərləri Materials 17 Oktyabr 2014 20:09 (UTC +04:00)

Azərbaycan, Bakı, 17 oktyabr /Trend, müxbir Azad Həsənli/

Azərbaycanda yanvar-sentyabr aylarında kənd təsərrüfatı məhsullarının istehsal həcmi faktiki qiymətlərlə 4 308,3 milyon manat təşkil edib və keçən ilin eyni dövrünə nisbətən 3,7 faiz azalıb. Bu barədə Trend Dövlət Statistika Komitəsinin 9 ayın yekunlarına dair hesabatına istinadən məlumat verir.

Hesabata əsasən, dəyər ifadəsində heyvandarlıq məhsulları istehsalı ötənilki səviyyədən 3,0 faiz çox olub, bitkiçilik məhsulları istehsalı isə 9 faiz azalıb.

Oktyabrın 1-nə ölkədə 1183,7 min hektar ərazidən məhsul yığılıb.

Ümumi əkin sahələrindən 985,2 min hektarı (və ya 99,1 faiz) dənli və paxlalı bitkilərin, 1,1 min hektarı tütünün, 22,9 min hektarı pambığın, 61 min hektarı (98,9 faiz) kartofun, 74,3 min hektarı (97,8 faiz) tərəvəzin, 28 min hektarı bostan bitkilərinin, 11,1 min hektarı isə dən üçün günəbaxanın payına düşüb.

Həmçinin hesabat dövründə ölkədə 2 178 ton taxıl (qarğıdalı istisna olmaqla) istehsal olunub. Hər hektardan orta hesabla 22,8 sentner taxıl yığılıb.

Toplanan qarğıdalı nəzərə alınmaqla 2014-cü ilin yanvar-sentyabr aylarında taxıl istehsalı 2338,3 min ton olub.

Hesabat dövründə tarlalardan 808,9 min ton kartof, 1125 min ton tərəvəz, 532,4 min ton meyvə və giləmeyvə, 439,9 min ton bostan məhsulları, 106,1 min ton üzüm, 20,4 min ton pambıq, 404,2 ton yaşıl çay yarpağı, 2,2 min ton tütün, 29,1 min ton şəkər çuğunduru və 19,8 min ton dən üçün günəbaxan toplanıb.

Ötən ilin müvafiq dövrü ilə müqayisədə dən üçün günəbaxan istehsalı 11,8 faiz, bostan məhsulları istehsalı 2,9 faiz, üzüm istehsalı 1,7 faiz, meyvə və giləmeyvə istehsalı 0,4 faiz artıb, dənli bitkilərin istehsalı 19,3 faiz, kartof istehsalı 17,8 faiz, tütün istehsalı 16,2 faiz, şəkər çuğunduru istehsalı 16 faiz, çay istehsalı 14,8 faiz, tərəvəz istehsalı isə 1,1 faiz azalıb.

Hesabat dövründə respublikada 324,9 min ton diri çəkidə ət, 1 416,3 min ton süd, 1164,2 milyon ədəd yumurta, 16,3 min ton yun istehsal edilib.

2013-cü ilin yanvar-sentyabr ayları ilə müqayisədə ölkədə ət istehsalı 1,5 faiz, süd istehsalı 3,6 faiz, yumurta istehsalı 11,6 faiz və yun istehsalı 1,5 faiz artıb.

Məqalədə:
Xəbər lenti

Xəbər lenti