Azərbaycan, Bakı, 3 noyabr /Trend, müxbir Maksim Tsurkov/
Azərbaycan Mərkəzi Bankının (AMB) cari ilin ilk doqquz ayı ərzində keçirdiyi valyuta intervensiyalarının həcmi 1,3 milyard dollara yaxın olub. Bu barədə bazar ertəsi Trend-ə AMB İdarə Heyəti sədrinin müavini Xaqani Abdullayev bildirib.
O deyib: "Proqnozlarımıza görə, 2014-cü ilin yekunları üzrə valyuta intervensiyasının həcmi təqribən 1,5 milyard dollar təşkil edəcək. Bu ilin doqquz ayı ərzində bu, 1,3 milyard dollara yaxın olub ki, bu da yaxşı göstəricidir".
Abdullayev əlavə edib ki, 2015-ci ildə Mərkəzi Bank daxili valyuta bazarındakı əməliyyatlara 1,5-2 milyard dollar yönəltməyi planlaşdırır.
Həmçinin, o qeyd edib ki, valyuta səbətində valyutaların nisbəti dəyişməyəcək: "Biz hələlik valyuta səbətində valyutaların nisbətində heç bir dəyişiklik planlaşdırmırıq. Manatın məzənnəsi elə həmin rejimdə tənzimlənəcək. Faktiki olaraq biz onu dollara bağlamışıq, bu, rahat variantdır. İndi dollar bütün xarici ticarət əməliyyatlarında üstünlük təşkil edir, son vaxtlar isə onun avroya nisbətdə məzənnəsində möhkəmlənmə tendensiyası müşahidə olunur".
2010-cu ildə AMB tərəfindən 1385 milyon, 2011-ci ildə 4153 milyon, 2012-ci ildə 1584 milyon, 2013-cü ildə 2457 milyon dollarlıq valyuta alışı həyata keçirilib.
Valyuta intervensiyası xarici valyutanın həddən artıq ucuzlaşmasının və ya milli məzənnənin möhkəmlədilməsinin və artıq həcmdə xarici valyuta alınmasının qarşısını almaq məqsədi ilə həyata keçirilir.
