Bakı. Trend:
Dəmir yolu sektoru Azərbaycanın inkişafı üçün kritik əhəmiyyət daşıyır və investisiyaların cəlb olunmasında, ticarət həcminin artırılmasında əsas rol oynayır.
Trend xəbər verir ki, bu barədə "Azərbaycan Dəmir Yolları" QSC-nin Tədqiqat və İnkişaf Mərkəzinin rəisi vəzifəsini icra edən Orxan Əhmədzadə Bakıda keçirilən "Azərbaycanda Dəmiryol Texnologiyalarında İnnovasiyalar: Alman Şirkətləri üçün Tərəfdaşlıqlar və İmkanlar" adlı İnformasiya tədbirində bildirib.
"Azərbaycan sürətlə ticarət və logistika mərkəzinə çevrildiyi bir vaxtda, Avropa və Asiyanın kəsişməsində yerləşməyimiz bizə Çin və Avropanı birləşdirən Orta Dəhliz kimi marşrutlarda önəmli yer tutmağa imkan verir. Hökumət, xüsusilə infrastruktur və logistika sahələrində yerli və xarici investisiyaları cəlb etmək üçün sabit, şəffaf və biznes üçün əlverişli mühit yaratmaq üzərində fəal işləyir. Bu səylər Azərbaycanı qlobal ticarətdə vacib oyunçuya çevirməklə yanaşı, ölkənin iqtisadiyyatını da şaxələndirməyə kömək edir", - o bildirib.
Onun sözlərinə görə, dəmir yolu sektoru Azərbaycanın inkişafı üçün kritik əhəmiyyətə malikdir və investisiyaların cəlb olunmasında, ticarət həcminin artırılmasında əsas rol oynayır.
"Azərbaycanın dəmir yolu şəbəkəsinin modernləşdirilməsi və genişləndirilməsi üçün böyük investisiyalar yatırılıb. Əsas layihələrdən biri Bakı-Tbilisi-Qars xəttidir, həmçinin şimal-cənub və şərq-qərb dəhlizlərinin inkişaf etdirilməsi sərhəd yükdaşımasını gücləndirmək və regional əlaqəni artırmaq məqsədi daşıyır. Bu layihələr sadəcə infrastruktur təşəbbüsləri deyil. Onlar Azərbaycanın Avrasiya logistika mərkəzinə çevrilmə öhdəliyini əks etdirir", — Orxan Əhmədzadə əlavə edib.
O vurğulayıb ki, bu layihələr Azərbaycanın qlobal təchizat zəncirlərində əsas halqa kimi mövqeyini gücləndirmək üçün daha geniş səylərin bir hissəsidir.