Bakı. Trend:
Azərbaycanın Litva üçün Mərkəzi Asiyaya “qapı”, Litvanın isə Azərbaycan üçün Baltik ölkələrinə “qapı” rolunu oynaması iki ölkə münasibətlərində ən perspektivli strateji ideyalardan biridir.
Bunu Trend-ə özəl müsahibəsində Bakı səfəri çərçivəsində Litvanın Baş naziri İnqa Ruqinene bildirib.
“Azərbaycan Avropanı Mərkəzi Asiya və daha geniş Xəzər regionu ilə birləşdirməkdə mühüm coğrafi və siyasi rol oynayır. Litva isə öz növbəsində Baltik regionuna, Şimali Avropaya və Avropa İttifaqının daxili bazarına çıxış üçün əlverişli mövqedə yerləşir, buna onun nəqliyyat infrastrukturu, logistika sektoru və Klaypeda limanı da daxildir.
Litva üçün bu, yalnız dar mənada ticarət məsələsi deyil. Söhbət həm də dəyişən geosiyasi mühitdə dayanıqlı qarşılıqlı əlaqələrin formalaşdırılmasından gedir. Rusiyanın Ukraynaya qarşı təcavüzü Avropanı tədarük zəncirlərini, tranzit marşrutlarını və ümumilikdə Avrasiya məkanında əlaqəlilik arxitekturasını yenidən nəzərdən keçirməyə məcbur edib. Bu kontekstdə Avropa, Cənubi Qafqaz və Mərkəzi Asiya arasında əlaqələri gücləndirən marşrutlar getdikcə daha böyük strateji əhəmiyyət qazanır.
Ruqinene “qapı” konsepsiyasını hər iki tərəf üçün faydalı praktik tərəfdaşlıq kimi qiymətləndirdiyini diqqətə çatdırır.
“Azərbaycan şərq istiqamətində yeni marşrutların və imkanların açılmasına töhfə verə bilər, Litva isə qərbə – Baltik və Şimali regionlara, həmçinin daha geniş Avropa İttifaqı bazarına çıxışı təmin edə bilər. Daha inkişaf etmiş nəqliyyat əlaqələri, biznes təmasları və institusional əlaqələndirmə ilə bu istiqamət uzunmüddətli əməkdaşlığın mühüm sahəsinə çevrilə bilər”, – Baş nazir bildirib.