Azərbaycan istehsalçıları özlərinin milli birliyini yaradırlar. Trend in məlumatına görə, belə təşəbbüslə avqustun 4-də istehsalçılar çıxış ediblər. Onlar iqtisadi inkişaf naziri Fərhad Əliyevə bir neçə şirkətin artıq Milli istehsalçılar birliyinin yaradılmasına dair müvafiq müraciətnaməni imzaladığı barədə məlumat veriblər. Fərhad Əliyev sahibkarlara Ədliyyə Nazirliyində uğurla qeydiyyatdan keçməyi arzu edib.
Nazir qeyd edib ki, bu təşkilat özünün yerli məhsullara yapışdırılacaq vahid loqosunu yaradacaq. "Bununla biz daxili bazara keyfiyyətsiz malların daxil olmasının qarşısını almağa hazırlaşırıq.
Məhsulun üzərində istehsalçı firmasının adı, məhsulun istehsal olunduğu il göstəriləcək. Və bununla da istehlakçının hüquqları müdafiə olunacaq", - deyə nazir qeyd edib.
Nazir onu da bildirib ki, yerli məhsulun keyfiyyətini artırmaq lazımdır. "Bu gün yerli bazarda vaxtı keçmiş xarici və yerli mallar var və onlar vətəndaşların həyatı üçün təhlükə yaradır.
Bu nöqteyi-nəzərdən hesab edirəm ki, bunun qarşısının alınması üçün təşkil olunmuş işdə ölkə vətəndaşları, dövlət orqanları, ictimai birliklər, istehsalçılar iştirak etməlidirlər.
İstehsalçılar keyfiyyətli məhsul buraxmalı, istehlakçılar isə keyfiyyətsiz mal aldıqda qanun üzrə tədbirlər görməlidirlər. Yalnız bu yolla daxili bazarda vəziyyəti yaxşılaşdırmaq olar.
Bu işlərlə yalnız dövlətin məşğul olması barədə fikirlər yanlışdır. Dövlət ticarətlə məşğul deyil, buna görə də alınan və satılan mallara görə məsuliyyət daşımır. Lakin o, öz "alətlərindən" istifadə edərək daxili bazarı müdafiə edə bilər, - deyə nazir bildirib.
