Garadagh Cement Açıq Tipli Səhmdar Cəmiyyəti müvvəqəti olaraq öz investisiya proqramlarından imtina edib. Müəssisənin İdarə Heyətinin sədri Uve Kellerin Trend ə verdiyi məlumata görə, son hesablamalara görə, investisiya proqramlarının dəyəri 75 milyon dollar deyil, 87 milyon dollar təşkil etməlidir.
"Lakin bir sıra səbbələr mövcuddur ki, onlar bu layihənin reallaşdırılmasına imkan vermədiyi üçün bu sahədə işlər müvəqqəti dayandırılıb. Bizim Tovuzdakı yataqlarla bağlı problemimiz var ki, bu problem hələ həll olunmayıb. Garadagh Cement Tovuzda tras müəssisəsi var. Lakin həmin müəssisə digər şirkət tərəfindən qanunsuz olaraq mənimsənilib. Biz sonun instansiyanın- İqtisad Məhkəməsinin qərarına malikik. Həmin sənəddə bildirilir ki, Tovuz İcra Hakimiyyətinin Tovuz yataqlarına olan hüququ bizə verilməlidir. Buna baxmayaraq, Eko-Servis şirkəti bu yatağı mənimsəyib və bizim ora daxil olmaq imkanımız yoxdur. Belə vəziyyət artıq il yarımdır ki, davam edir. Bu məsələlər həll olunmayana kimi, investisiya layihəsinin reallaşdırılmasına başlanılmayacaq ", - deyə Uve Keller bildirib.
Qeyd edək ki, Garadagh Cement-in investisiya proqramı həmçinin yeni sobanın tikintisini də nəzərdə tutur.