Hesablama Palatasının (HP) Lənkəran, Masallı, Lerik, Astara və Yardımlı rayonlarının mədəniyyət şöbələrində apardığı yoxlama nəticəsində büdcə vəsaitlərinin təyinatı üzrə istifadəsində bir sıra pozuntular aşkar olunub. HP-dən Trend xəbər agentliyinə verilən məlumata görə, yoxlamaların nəticəsi ötən həftənin sonunda HP-nin iclasında müzakirə olunub. Aparılmış audit isə ötən il dövlət büdcəsindən sözügedən rayonların mədəniyyət, incəsənət, kütləvi informasiya, bədən tərbiyəsi və din sahələrinə ayrılan vəsaitlərin təyinatı üzrə xərclənib-xərclənmədiyini əhatə edib. Audit zamanı müəyyən olunub ki, sözügedən sahələrdə işləyən orta təhsilli işçilərə orta ixtisas təhsilli mütəxəssislərin tarif dərəcələrinə uyğun əmək haqqı ödənilmiş, mədəniyyət şöbələrində tələb olunan vəsaitlərin həcmi müəyyən edilərkən qüvvədə olan normativ sənədlərə tam riayət edilməmiş, ştat vahidlərinin sayı artırılmış və s. pozuntulara yol verilmişdir. Yaxın günlərdə auditin nəticələri barədə Maliyyə və Mədəniyyət nazirliklərinə təqdimatlar, qəbul edilən qərarlar barəsində Milli Məclisə, rayon icra hakimiyyəti başçılarına isə müvafiq məlumat təqdim ediləcək.
Qeyd edək ki, bu rayonlarda 274 klub müəssisəsi, 392 kitabxana, 6 muzey, 4 şəkil qalereyası və 5 park da daxil olmaqla sözügedən sahələrin saxlanılmasına 2004-cü ildə dövlət büdcəsindən 4 milyard 359 milyon manat vəsait ayrılmışdır.
