Asiya İnkişaf Bankı Azərbaycan hökumətinə xaricdə yaşayan azərbaycanlılar tərəfindən pul köçürmələrinin ölkədə yoxsulluğun səviyyəsinə təsirini qiymətləndirməyi təklif edib. Bu barədə Trend ə hökumətdən bildirilib.
Mərkəzi Asiya və Qafqaz ölkələri üçün nəzərdə tutulmuş qiymətləndirmə prosesi AİB-in regional texniki yardımı çərçivəsində həyata keçirriləcək. Layihənin reallaşdırılmasına hazırlıq işləri 2005-ci il ərzində aparılıb. Bankın iqtisadçısı Bahadır Qəniyevin rəhbərlik etdiyi birinci missiya ötən həftə Azərbaycanda olub.
Bu istiqamətdə Azərbaycan hökuməti ilə müzakirələr aparılıb və layihənin respublikada reallaşdırılması ilə bağlı ilkin razılıq əldə olunub. Layihədə əsas məqsəd ölkəyə rəsmi və qeyri-rəsmi pul axınlarının müəyyən edilməsindən ibarətdir. Azərbaycanın ödəniş balansına əsasən, 2004-cü ildə $190 mln həcmində pul köçürmələri həyata keçirilib. 9 ay ərzində isə bu göstərici $300 mln təşkil edib. Bu layihə ilə bağlı işlərin 2006-cı ildə başlanacağı gözlənilir.
