Dünya bankı sığorta sahəsində qanunvericiliyin təkmilləşdirilməsi məqsədilə Azərbaycana $323 min qrant ayırıb. Maliyyə nazirliyinin sığorta nəzarəti idarəsinin rəisi Bəybala Xankişiyevin Trend ə verdiyi məlumata görə, qrant sazişi yaxın vaxtlarda səlahiyyətlərin verilməsindən sonra imzalanacaq.
Maliyyə nazirliyi "Sığorta haqqında" və "Sığortanın icbari növləri haqqında" qanun layihələrini yeni redaktədə qəbul etməyi planlaşdırır. Birinci qanun layihəsi DB ekspertləri ilə razılaşdırıldıqdan sonra 2006-cı ilin sonunadək parlament tərəfindən qəbul olunması üçün hökumətə təqdim ediləcək.
Sığorta bazarının kifayət qədər inkişaf etməməsi ilə əlaqədar bu qanunda həyatın sığortalanması üzrə ixtisaslaşdırılmış şirkətlərə ayrılma nəzərdə tutulmur. Lakin maliyyə nazirinin müavini Azər Bayramovun sözlərinə görə, "sonda məhz bu prosesin həyata keçirilməsinə çalışacağıq". Bu məqsədlə nazirlik yaxın 2-3 il üçün müvafiq işlərin qrafikini müəyyənləşdirməyi planlaşdırır.
Onun sözlərinə görə, nazirlik Azərbaycanda sığortaetmənin təkmilləşdirilməsi üzrə xüsusi dövlət proqramını işləyib hazırlamağı planlaşdırır. 2006-cı il ərzində BMİ ilə qanunvericilik aktlarının təkmilləşdirilməsi istiqamətində işlər aparılacaq. İcbari sığortanın 9 növü üzrə mexanizmin təkmilləşdirilməsi çərçivəsində 2007-ci ildə "Sığortanın icbari növləri haqqında" yeni qanun layihəsinin qəbul olunması nəzərdə tutulur.
Azərbaycanda və digər MDB ölkələrində sığorta ilkin inkişaf mərhələsindədir. MDB ölkələrində ÜDM üzrə sığorta bazarının əsas çəkisi 1%, inkişaf etmiş ölkələrdə isə 8%-dək təşkil edir. Keçən il Azərbaycanda bu göstərici 0,8%-ə bərabər olub ki, bu da 2001-ci illə müqayisədə 0,6% çoxdur.
A. Bayramov hesab edir ki, son 5 il ərzində sığorta bazarında irəliləyişlər müşahidə olunur. 2001-ci illə müqayisədə 2005-ci ildə sığorta daxilolmaları 5,3 dəfə artıb. 2001-ci ildə sayı 45 olan sığorta şirkətlərinin 2005-ci ildə 28-dək azaldılmasına baxmayaraq, bütün şirkətlərin nizamnamə kapitalının ümumi həcmi 5,4 dəfə artıb. Lakin bu şirkətlərin rəqabət qabiliyyətini artırmaq və imkanlarını genişləndirmək məqsədilə nazirlik kapitallaşdırmaya qarşı tələbi artırmaq niyyətindədir.
