Ötən il dekabrın 23-də Bakı yaxınlığında qəzaya uğramış AN-140-100 təyyarəsinin "qara qutu"sundan məlumatların götürülməsi ilə bağlı proses başa çatıb. Hazırda əldə olunan məlumatların işlənməsi prosesi başlayıb və bundan sonra qəzanın baş vermə səbəbləri barədə yekun rəy çıxarılacaq. Bu barədə Trend ə Dövlət Konsernindən bildirilib. İlkin məlumatlara görə, qəza hava gəmisinin fəzadakı vəziyyəti üçün cavabdeh olan cihazın sıradan çıxması üzündən baş verib.
Təyyarənin qırıqlarının bəzi hissəsələri öyrənilmək üçün bu təyyarələrin istehsalçısı olan Xarkov Dövlət Aviasiya müəssisəsinə göndərilib.
Qəzanın səbəbləri araşdırılacana kimi AZAL bu təyyarələrin alınmasını və istismarını dayandırıb. AH-140-100 markalı təyyarələrinin alınması AZAL DK ilə Xarkov Dövlət Aviasiya Müəssisəsi arasında 2004-cü il iyulun 8-də imzalanan müqavilə əsasında həyata keçirilib. Müqavilədə təyyarələrin uçuş-texniki personalının təhsili və texniki yardım da nəzərdə tutulub. Müqavilənin dəyəri (təyyarənin hər biri $9,1 mln. olmaqla) $36,4 mln-dur. AZAL iki təyyarə alıb.
Təyyarə qəzası nəticəsində 18 sərnişin və 5 heyət üzvü həlak olub. Həlak olanlar arasında Azərbaycan, Qazaxıstan, Avstraliya, İngiltərə, Türkiyə və Gürcüstan vətəndaşları da olub. "AZAL" Dövlət Konserninə məxsus təyyarə H.Əliyev adına beynəlxalq hava limanından Bakı-Aktau marşrutu üzrə uçuşu həyata keçirirdi. O. Havaya qalxdıqdan bir neçə dəqiqə sonra qəzaya uğrayıb.
