Aprelin 11-də Regional əməkdaşlığın genişləndirilməsi imkanları və tranzit məsələləri Urumçidə (ÇXR-nın Sindzyan-Uyğur Muxtariyyəti) keçirilən Asiya İnkişaf Bankının (AİB) Mərkəzi Asiya regional iqtisadi əməkdaşlığı üzrə proqramı (CAREC) ilə bağlı yüksək rütbəli rəsmi şəxslərin iclasında müzakirələrin predmeti olub. İqtisadi İnkişaf Nazirliyinin investisiya və iqtisadi əməkdaşlıq şöbəsinin rəhbəri Elşən Məmmədzadənin Trend ə verdiyi məlumata görə, bu iclas ərəfəsində Energetika Əməkdaşlığı üzrə Əlaqələndirmə Komitəsinin iclası (aprelin 9-da) və Ticarət siyasəti üzrə Əlaqələndirmə Komitəsinin (aprelin 8-də) 4-cü iclası keçirilib.
Görüşdə ticarət rejiminin yaxşılaşdırılması imkanları, sənədlərin uyğunlaşdırılması, ticarətə yardım, ticarət münasibətlərinin yaxşılaşdırılması imkanlarına baxılıb. Eləcə də, digər regional layihələr arasında əlaqələndirmə, proqram çərçivəsində beynəlxalq maliyyə institutlarının səylərinin əlaqələndirilməsinin zəruriliyi barədə danışılıb. Məsələn, Bakı -Gürcüstan sərhədi avtomagistralının rekonstruksiyası TRASEKA dəhlizi və CAREC proqramının əsas hissəsidir. AİB bu magistralın 2 hissəsi üçün $52 mln maliyyə vəsaiti ayırıb.
E.Məmmədzadənin sözlərinə görə, regional status almış bütün layihələr CAREC çərçivəsində maliyyələşdirilən layihələrin siyahısına daxil edilə bilər. Cənubi Asiya TRASEKA dəhlizi ilə malların Avropa bazarlarına daşınmasında maraqlıdır. Enerji ehtiyatlarının nəql olunması məsələsində gələcəkdə qazax neftinin BTC vasitəsilə nəqlinin mümkünlüyü nəzərdən keçirilir.