Birinci rübdə Azərbaycanda 99,8 min hektar sahə əkilib ki, bu da ötən ilki göstəricilə müqaisədə çoxdur. Trend agentliyinin Dövlət Statistika Komitəsinə istinadən yaydığı məlumata əsasən, bunun əsas səbəbi yaz bitkiləri səpininin artırılmasıdır.
21,1 min hektar sahədə (13,3% artım ilə) tərəvəz bitkiləri, 2,8 min hektar sahədə (41,2% artım) isə bostan bitkiləri əkilib. Kartof səpini 1,1 min hektar və ya 3,3% artaraq 35,2 min hektar təşkil edib.
Pambıq əkini 606 hektar sahədə həyata keçirilib ki, bu da ötən ilki göstəriciyə görə 2,9 dəfə çoxdur. Hesabat müddəti ərzində çuğundur əkininin payına 994 hektar sahə düşüb.
Üç ay ərzində ət, süd və yumurta məhsullarının istehsalında artım müşahidə olunub. Ət istehsalı 64,3 min ton, süd - 294,9 min ton və yumurta 203,6 mln. ədəd təşkil edib. Ötən ilki müddətlə müqaisədə bu məhsulların artımı 2,1%, 4,6% və 8,7% təşkil edib.
Yanvar-mart aylarında bir inəkdən 258 kq süd alınıb ki, bu da ötən illə müqaisədə 6 kq çoxdur.