Hazırda Azərbaycan mayın 2-3-də Sofiyada keçiriləcək TRACECA ölkələrinin hökumətlərarası komissiyasının beşinci iclasında iştirak edəcək nümayəndə heyətinin tərkibini müəyyənləşdirir. Bu barədə Trend agentliyinə həmin təşkilatın Azərbaycan üzrə milli katibi Akif Müstafayev bildirib.
Qarşıdakı iclasda 2015-ci ilə qədər nəqliyyat dəhlizinin inkişaf strategiyasının müzakirəsi və qəbulu nəzərdə tutulub. Həmçinin, 2007-ci il büdcəsi və təşkilatda müşahidəçi statusu da nəzərdən keçiriləcək.
A.Mustafayevin bildirdiyinə görə, iclas zamanı Poti-Bakı-Aktau-Almatı marşrutu ilə işləyən nümayiş konteyner qatarı layihəsinin də müzakirəsi planlaşdırılır. Hazırda Azərbaycan, Qazaxıstan və Gürcüstan həmin marşrutun Çin-Qazaxıstan sərhədindəki Dostık stansiyasına qədər uzadılması barədə danışıqlar aparır. Ekspertlərin fikrincə, bu yük daşımalarının həcmini xeyli artırmağa imkan verəcək.
Həmin iclas çərçivəsində Qars-Axalkalaki-Tbilisi-Bakı marşrutu ilə dəmiryolunun açılması məsələsinə də baxılacaq.
