Hökumətdən Trend agentliyinə verilən məlumata əsasən, MDB-nın Beynəlxalq aviasiya komissiyası dekabrın 23-də Bakı yaxınlığında AN-140-100 təyyarəsinin qəzaya uğraması səbəbləri haqqında aprelin sonuna qədər rəy verəcək.
"Qara qutu"nun açılması prossesi başa çatıb. Hazırda məlumatlar üzərində iş gedir və bu prosses başa çatdıqdan sonra qəzanın səbəbləri haqqında rəy veriləcək.
AZAL qəzanın səbəbləri müəyyənləşənədək həmin təyyarələrin alınması və istismarını dayandırıb. Bu təyyarə 2004-cü ilin iyulun 8-də AZAL ilə Xarkov dövlət aviasiya müəssisəsi arasında imzalanmış müqaviləyə əsasən alınıb.
Müqavilədə həmçinin, təyyarə heyətinə təlimlərin keçilməsi və təyyarələrə texniki xidmətlərin göstərilməsi nəzərdə tutulb. Müqavilənin dəyəri 36,4 mln. dollardır. İndiyə qədər AZAL iki təyyarə alıb.
Qəza nəticəsində 18 sərnişin və 5 ekipaj üzvü həlak olub. Həlak olanlar arasında Azərbaycn, Qazaxıstan, Avstraliya, İngiltərə, Türkiyə və Gürcüstan vətəndaşları da var. AZAL-a məxsus təyyarə Heydər Əliyev adına beynəlxalq hava limanından havaya qalxıb və bir neçə dəqiqədən sonra qəzaya uğrayıb.
