Parlamentdə "Siyasi partiyalar haqqında" qanuna əlavə və dəyişikliklər edilməsi üçün hazırlıq prosesi gedir. Bu barədə Trend ə millət vəkili, Vətəndaş Həmrəyliyi Partiyasının (VHP) sədri Sabir Rüstəmxanlı məlumat verib.
O bildirib ki, qanuna dəyişikliklərin parlamentdə bu il qəbul edilməsi gözlənilir. Lakin parlamentin hansı sessiyasında olacağı hələlik məlum deyil: "Qanun üzərində iş aparılır, parlamentdə bu barədə ümumi söhbətlər gedir. Amma konkret olaraq nə vaxt müzakirəyə çıxarılacağı və qəbul ediləcəyi barədə qərar yoxdur".
S.Rüstəmxanlının sözlərinə görə, sözügedən qanuna dəyişiklər edilərkən əsasən siyasi partiyaların fəaliyyətinə daha geniş şərait yaradılması, onların qeydiyyata alınması ilə bağlı bürokratik əngəllərin aradan qaldırılması nəzərdə tutulmalıdır: "Məsələn, beş min nəfər yığışıb qurultayını keçirir və ya öz partiyalarını yaradırsa, onlar qeydiyyat üçün illərlə növbədə dayanmamalıdırlar. Qanuna müvafiq şəkildə sənədlər Ədliyyə Nazirliyinə təqdim olunubsa, qanunda göstərilən vaxta qədər də qeydiyyat məsələsi həll olunmalıdır. Həmçinin prezident, parlament və bələdiyyə seçkilərində iştirak etmiş və müəyyən uğurlar qazanmış partiyalar dövlət tərəfindən maliyyələşməlidir və bu məsələ də "Siyasi partiyalar haqqında" qanuna əlavə oluna bilər".
