Trend agentliyi Beynəlxalq Maliyyə Korporasiyasının (BMK) yaydığı məlumata istinadən xəbər verir ki, BMK Azəriqazbankın nizamnamə kapialında iştirak payı almaq məsələsinə baxılmasını qeyri-müəyyən müddətə təxirə salıb.
BMK $2,3 mln. həcminlə 17,5%-lik iştirak payının alınmasını elan etmişdir ki, bu qərar aprelin 30-da Direktorlar Şurasında təsdiqlənməli idi.
Bunun üçün bankın səhmlərinin emissiyası elan olunacaqdır ki, bu da bankın nizamnamə kapitalının 12 mln. AZY-ə çatdırılması haqqında səhmdarların qərarı çərçivəsində həyata keçirilməlidir. Hazırda Azəriqazbankın səhmdarlarının 94%-i fiziki şəxslərdir.
Məlumatda deyilir ki, Azəriqazbank Azərbaycanın bank sektorunda aparıcı yer tutur, kiçik və orta sahibkarlığın maliyyələşdirilməsini təşkil edən və digər xidmətlər göstərən özəl banklardan biridir.
Azəriqazbank 1998-ci ildən BMK-nın müştərisidir. O zaman banka $400 min həcmində ilk kredit xətti açılmışdır. Bankın genişlənməsi, eləcə də kiçik və orta sahibkarlığın inkişafı nəticəsində BMK 2003-cü ildə kredit xəttini $1,2 mln. məbləğədək artırıb. Məlumatda deyilir ki, uzunmüddətli maliyyələşdirmə banka mühasibat uçotunu gücləndirməyə imkan verəcək. Bankın institusional inkişafı üçün investisiyalarla yanaşı texniki yardım da göstəriləcək.
