Mayın 3-də Ukrayna Hesablama Palatasının nümayəndə heyəti başda sədr Valentin Simonenko olmaqla Bakıya gələcək. Hesablama Palatasından Trend ə verilən məlumata əsasən, əvvəl səfər fevralın sonuna planlaşdırılmışdı, lakin Ukrayna tərəfinin xahişi ilə təxirə salınmışdı.
Səfərin ilk günü - mayın 4-də V.Simonenko Şəhidlər Xiyabanı və Fəxri Xiyabana baş çəkəcək. Elə həmin gün iki orqan arasında əməkdaşlıq haqqında saziş imzalanacaq, əməkdaşlığın gələcək istiqamətləri, təcrübə mübadiləsi, kadr hazırlığı, hesablama palatalarının ticari-iqtisadi əlaqələrin inkişafında rolunun artırılması məsələləri müzakirə olunacaq.
"Gələcəkdə Ukrayna mütəxəssisləri ilə birgə yoxlamaların gerçəkləşdirilməsi də istisna deyil" - deyə qurumda bildiriblər.
Bundan əlavə, üçgünlük səfər zamanı nümayəndə heyətinin bir sıra Azərbaycan rəsmisi ilə görüşü gözlənilir.
