Əgər bu gün qeyri-neft çatışmazlığı qeyri-neft sahəsində ÜDM-in 14%-ni və ölkə ÜDM-in təxminən 8%-ni təşkil edirsə, 2009-cu ildə bu göstərici ÜDM-in 5%-nə və qeyri-neft ÜDM-in 8%-nə bərabər olacaq. Trend in verdiyi xəbərə görə, bu barədə İqtisadi İnkişaf Nazirliyinin makroiqtisadiyyat şöbəsinin rəisi Ədalət Muradov bildirib.
"Azərbaycanın ÜDM-in 41%-i, ölkə ixracatının 76%-dən çoxu ötən ilin yekunlarına görə neft sektorunun payına düşür. Dövlət büdcəsinin 34%-i neft gəlirlərindən yaranır. Sərmayələrin böyük hissəsi də neft-qaz layihələrinə qoyulub. Lakin Azərbaycanın gələcəyi qeyri-neft sektoru ilə bağlıdır, halbuki bu sektorun inkişafı da neft sektorundan, yəni ekspertlərin hesablamalarına görə, 20 il ərzində 140 milyard ABŞ dolları təşkil edəcək neft gəlirlərindən necə istifadə olunmasından asılı olacaq", - deyə Ə.Muradov qeyd edib.
Onun sözlərinə görə, xarici dövlətlərin təcrübəsi göstərir ki, ölkə nə qədər kiçikdirsə, neft gəlirlərindən qeyri-effektiv istifadə riski bir o qədər böyükdür. Azərbaycanda bunun qarşısını almaq üçün hökümət neft gəlirlərindən istifadənin 2004-cü ildə təsdiq olunmuş və 2025-ci ilə qədərki dövrü əhatə edən uzunmüddətli strategiyasını həyata keçirir.
Neft gəlirlərindən effektiv istifadənin əsas prinsipləri aşağıdakılardır:
- daimi real xərc prinsipi: söhbət ondan gedir ki, Azərbaycan 2025-ci ilə qədər hər il real surətdə neft gəlirlərindən eyni məbləğ xərcləyəcək;
- daimi real xərclərin dəyişilməzlik prinsipi;
- qeyri-neft çatışmazlığının nəzərə alınması;
- neft gəlirlərinin istifadəsində şəffaflıq.
O bildirib ki, neft gəlirləri ilə maliyyələşdirilən layihələr dövlət investisiya proqramına daxil ediləcək və Milli Məclisdə təsdiq olunacaq.
