Dövlət qiymətli kağızların girov altında qeydiyyat prosedurunun tezləşdirilməsi üçün banklararası kreditləşmə zamanı Bakı banklararası valyuta birjası (BBVB), Bakı fond birjası, Milli Bank və digər iştirakçılar arasında məsləhətləşmələr aparılıb. Trend in xəbər verdiyi kimi, BFB-nin prezidenti Anar Axundov junralistlərə bildirib ki, tərəflər Milli bankda qeydiyyat zamanı bu üsulun tətbiq edilməsi barədə razılığa gəliblər. Bunun üçün Qiymətli kağızlar üzrə Dövlət Komitəsi nümunə müqaviləsi hazırlayıb. Bu müqavilə əsasında BBVB-yə qiymətli kağızların girov altında rəsmiləşdirilməsi üçün təşkil edilmiş banklararası kredit bazarının iştirakçı bankları adından çıxış etmək səlahiyyəti veriləcək.
Nümunə müqaviləsi girovun rəsmiləşdirilməsi üçün Dövlət komitəsinə operativ qaydada məlumat təqdim etməyə imkan verəcək. A.Axundov hesab edir ki, prosedurlar üzrə xüsusi uyğunsuzluq yoxdur, mexanizmi sınaqdan keçirmək lazımdır və bundan sonra o tətbiq ediləcək. O ehtimal edir ki, problem və mövqelərin toqquşması olmamalıdır.
Girov mexanizminin inkişafı üçün birjalar, Dövlət komitəsi və Milli depozit mərkəzi arasında ötən ildən danışıqlar aparılır. Hazırda banklararası kreditləşmə girovsuz sistemlə, etimad və valyuta birjası tərəfindən müəyyən olunan əməliyyat limitləri əsasında həyata keçirilir. TBKB-da əməliyyat dövrü üç gündən otuz günə qədər, Milli Bankın notalarının da tədavül müddəti 28-30 gün olduğundan, onlar belə bir nəticəyə gəliblər ki, notalar TBKB-də girov qismində çıxış edə bilər. Uzunmüddətli qiymətli kağızlardan istifadə etmək yaxşı olardı və bu, banklara daha uzun müddətli vəsait cəlb etmək imkanı verərdi. Valyuta birjasında belə hesab edirlər ki, emitenti dövlət olan istənilən QK ən yaxşı girov mexanizmi ola bilər. İkinci bazar inkişaf etdiyindən, xüsusilə də indiki şəraitdə onlar daha cəlbedici görünür.
Girovun qanuniləşdirilməsində ən mühüm problem bu prosedurun bir həftə çəkməsi olub. QKDK-dən qanuniləşdirmə müddətinin bir günə qədər azaldılması barədə razılıq alınıb.