Almaniyanın KFW bankı və Azərbaycan hökuməti Gəncə və Şəkidə su şəbəkələrinin bərpa layihəsində dövlət payının 0,6 mln.avro (7,6 mln. avroya qədər) artırılması haqqında razılaşıb. Bu barədə Trend ə bankın Bakı ofisinin rəhbəri Natiq Abdullayev bildirib.
Əvvəllər hökumətin layihədəki payının 1,25 mln. avro artırılması planlaşdırılırdı ki, bu da su şəbəkələrinin dövriyyə xərcləri üçün nəzərdə tutulurdu. Belə bir təklif xərclərin layihə üçün ayrılmış investisiyalar hesabına ödənilməməsi məqsədindən irəli gəlirdi. Lakin tərəflər dövlət payını 0,6 mln. avro artırmaq barədə razılığa gəlib. Gələcəkdə Gəncə və Şəki su şəbəkələrinin xərcləri əhalinin ödədiyi su pulu hesabına ödəniləcək.
Bununla əlaqədar müəssisələrin gəlirliyi üçün su tariflərini artırmaq təklif olunur ki, bu da hökumətlə əldə olunmuş razılığa əsasən tədricən həyata keçiriləcək.
N.Abdullayevin sözlərinə görə, su layihəsi üzrə sənədlər paketi hökumətə təqdim olunub və kredit sazişinin imzalanmaq səlahiyyətlərinin maliyyə naziri Samir Şərifova verilməsi gözlənilir.
Prosesi sürətləndirmək üçün KFW layihə məsləhətçisinin seçilməsi üçün tender keçirmək xahişilə "Azərsu" SC-yə müraciət edib.
Layihənin 3,5-4 ilə nəzərdə tutulmuş birinci mərhələsinin dəyəri 54,6 mln. avro həcmində razılaşdırılıb. Bundan 37 mln. avro (25,85 mln. avro yeni kredit və İmişlidəki analoji işlərin qalığı) KfW, 10 mln. avro SECO, 7,6 mln. avro Azərbaycan hökumətinin payı hesabına ödəniləcək.