Azərbaycan-Tatarıstan hökumətlərarası iqtisadi komissiyasının 1-ci iclası avqustun 1-də Bakıda keçiriləcək. Bu barədə Trend ə Nazirlər Kabinetindən məlumat verilib. Tatarıstan tərəfindən həmsədr baş nazir Rüstəm Minixanovdur. Azərbaycan tərəfdən komissiyanın başçısı bu günlərdə təyin olunacaq.
İclasda komissiyanın əsasnaməsi və gündəliyinin təsdiq ediləcəyi gözlənilir. Müzakirələrin gündəliyinə ticari-iqtisadi və humanitar sahədə əməkdaşlıq məsələləri daxil ediləcək.
Hökumətdə hesab edilir ki, xarici ticarət dövriyyəsinin genişləndirilməsi üçün böyük potensial var ki, bu da yarım ilin yekunları ilə təsdiqlənir. 2006-cı ilin 6 ayı ərzində iki ölkə arasında ticarət dövriyyəsi 3,4 dəfə artaraq $25,7 mln təşkil edib.
Komissiyada neft-mədən avadanlıqlarının istehsalı, neft kimya sahələrində müştərək müəssisələrin yaradılması, humanitar, səhiyyə və təhsil sahələrində əməkdaşlığın inkişafı imkanları nəzərdən keçiriləcək.