İqtisadi İnkişaf Nazirliyinin mikro və kənd təsərrüfatı maliyyələşdirilməsi üzrə kreditin strukturunun dəyişdirilməsi haqqında Asiya İnkişaf Bankına məktubu hökumətin həmin layihəni gerçəkləşdirməkdə maraqlı olduğunu göstərir. Bunu Trend ə bankın Bakı nümayəndəliyindən xəbər veriblər. Nazirlik məktubda dövlət zəmanəti olmadan kreditin özəl sektora keçirilməsini xahiş edir.
Bankın nümayəndəliyindən bildiriblər ki, Azərbaycan hökumətinin bu layihənin gerçəkləşdirilməsinə dair konseptual razılığını aldıqdan sonra prosesi tezləşdirmək olar. Bu məqsədlə avqustun sonuna qədər AİB missiyasının Bakıya səfəri gözlənilir. Bu layihə çərçivəsində layihənin yeni strukturu müəyyənləşdiriləcək. Bank layihədən asılı olaraq kreditin həcminin dəyişdirilməsini istisna etmir.
AİB hökumətə $25 mln. (gələcəkdə $100 mln.-a çatdırmaq şərtilə) kredit ayırmağa hazır olduğunu bəyan edib.