Azərbaycanda qəbul edilən qanunlar dünya standatrlarının vacib məqamları ilə üst-üstə düşür. Bu barədə Trend ə iqtidaryönlü partiyaların Məşvərət Məclisinin üzvü, Ana Vətən Partiyasının sədri, millət vəkili Fəzail Ağamalı Avropa Şurası Venesiya Komissiyasının "Sərbəst toplaşmaq azadlığı haqqında" qanunda nəzərdə tutulan bəzi müddəaların dəyişdiyirlməsi təkliflərinə münasibət bildirərkən qeyd edib.
Onu da bildirək ki, Avropa Şurası Venesiya Komissiyasının ekspertləri adıçəkilən qanuna mümkün düzəlişlər üzərində işləyirlər. ATƏT-in Bakı ofisi də iqtidarla müxalifət arasında planlaşdırdığı dialoqda bu məsələni müzakirəyə çıxaracaq.
Əlavə edək ki, Milli Məclisin insan hüquqları, hüquq siyasəti və dövlət quruculuğu daimi komissiyalarının birgə keçirilən iclasında bəzi millət vəkilləri "Sərbəst toplaşmaq haqqında" qanuna aksiyaları dağıdan polsilərin rezin dəyənək, elektroşok cihazlar, rezin güllələr, xidməti atlar və itlər, gözyaşardıcı qazdan istifadə edilməsi ilə bağlı maddənin əlavə edilməsinə etiraz ediblər. Buna görə də sənəd yenidən hazırlanmaq üçün adıçəkilən komissiyalara qaytarılıb.
F.Ağamalı bildirib ki, Azərbaycanda qəbul edilən qanunlar dünya standatrlarının vacib məqamları ilə üst-üstə düşür və bu qanunlar demokratik cəmiyyətin inkişafına xidmət edir: "Təəssüf edirəm ki, bəzi xarici təşkilatlar və daxili qüvvələr Azərbaycanda demokratik inkişafdan çox anarxiyanın olmasını arzulayır. Buna da yol vermək olmaz. Bəzi daxili qüvvələr bir sıra beynəlxalq təşkilatların təzyiqi ilə Azərbaycanda qəbul edilən qanunları öz istədikləri kimi dəyişdirməyə səy göstərir".