Dünya Bankının Azərbaycanla tərəfdaşlıq strategiyası (2006-2007-ci illlər üçün) hələ də bankdaxili prosedurlardan keçir, ona görə də bu gün onun bankın direktorlar şurasında müzakirəsi gözlənilmir. Bu barədə Trend ə DB-nin Bakı nümayəndəliyindən bildirilib.
"İşlər davam etdirilir, belə ki, gözlənildiyindən daha çox vaxt tələb olunub və yaxın həftə ərzində strategiya ilə bağlı məsələ aydınlaşacaq. Bundan başqa, sənədin sırf texniki cəhətdən yaxşılaşdırılması nəzərdə tutulub", - deyə nümayəndəlikdə bildirilib.
İlkin məlumatlara görə, strategiyanın bankın direktorlar şurasında baxılması sentyabrın 7-nə gözlənilirdi. Bu müddətə sənədin baxılmasının bankdaxili proseduralarının başa çatmamasını sentyabrın 14-16-da Sinqapurda keçiriləcək DB və BVF rəhbər işçilərinin illik yığıncağına hazırlıq tədbirləri ilə də əlaqələndirmək olar.
Bir qədər əvvəl isə tərəfdaşlıq strategiyasının təsdiqinin bu vaxtacan ləngiməsinin səbəblərindən biri kimi, 2007-ci il üçün AR-ə güzəştli kreditlərin həcminin müəyyən olunmaması ilə yanaşı, 2015-ci ilədək nəzərdə tutulmuş Yoxsulluğun azaldılması və davamlı inkişaf üzrə Dövlət Proqramı layihəsinin təsdiqinin gecikməsi göstərilirdi. Sənəd hələ də hökumətdə nəzərdən keçirilir. DB strategiyanı bankın direktorlar şurasının müzakirəsinə Dövlət Proqramı ilə birgə çıxarmağı planlaşdırırdı.
Strategiyanın ümumi dəyəri təxminən $1,2 mlrd. həcmində qiymətləndirilir ki, bunun da $79,4 mln.-u 2007-ci ildə güzəştli kreditlər qismində Beynəlxalq İnkişaf Assosiasiyasının, qalan hissəsi isə Beynəlxalq Yenidənqurma və İnkişaf Bankının xətti ilə ayrılacaq.
Bankın Azərbaycanla tərəfdaşlıq strategiyasına əsasən, gələn il bank təhsil sahəsində, mühasibat uçotunun təkmilləşdirilməsi, su təchizatı və kanalizasiya sistemi, dəmir yolu şəbəkəsinin inkişafı, kadastr qeydiyyatına dair layihələri maliyyələşdirmək niyyətindədir.
