...

Mahmud Məmmədquliyev: Azərbaycan ÜTT ölkələrinin suallarına cavabını təşkilatın katibliyinə göndərməyə hazırdır

Biznes və iqtisadiyyat xəbərləri Materials 9 Sentyabr 2006 12:15 (UTC +04:00)

Trend-i buradan izləyin

Azərbaycanın Ümumdünya Ticarət Təşkilatına (ÜTT) daxil olmasına hazırlıq üzrə Dövlət Komissiyası təşkilata üzv ölkələrin suallarına cavabı yaxın bir-iki həftə ərzində ÜTT-nin katibliyinə göndərəcək. Xarici işlər nazirinin müavini, danışıqlar qrupunun başçısı Mahmud Məmmədquliyevin bildirdiyinə görə, cavablar hazırdır və artıq ingilis dilinə tərcümə olunub, lakin hazırlanmasına cəlb olunmuş nazirlik və idarələr bir daha onları nəzərdən keçirməlidirlər. Yalnız bundan sonra cavablar ÜTT-nin katibliyinə göndəriləcək.

"ÜTT-yə üzv ölkələrin cavablarla tanış olması üçün, adətən, iki ay tələb olunur və bundan sonra növbəti (5-ci) görüşün tarixi müəyyən olunacaq. Hesab edirəm ki, noyabr növbəti danışıqlar raundu üçün real tarixdir", - deyə M. Məmmədquliyev qeyd edib.

İkitərəfli danışıqlar Azərbaycanın mal və xidmət bazarına çıxış, çoxtərəfli danışıqlar isə kənd təsərrüfatının daxili dəstəklənməsi və bu sahədə ixrac subsidiyaları məsələləri üzrə aparılır.

Çoxtərəfli danışıqlar çərçivəsində suallar Kanada, ABŞ, Avropa İttiifaqı, Türkiyə və Yaponiya tərəfindən təqdim olunub. İkitərəfli danışıqlara hazırlıq üçün isə ABŞ, Kanada, Aİ, Avstraliya, Yaponiya və Çindən suallar alınıb.

Azərbaycanın təkliflərini qəbul etmiş ölkələrlə - Gürcüstan, Moldova və Omanla ikitərəfli müqavilənin imzalanması Cenevrədə növbəti görüş zamanı baş tuta bilər. "İndi bizim üçün vacib olanı danışıqları davam etdirmək və bu təşkilatda əsas sözükeçən insanları bizim təkliflərlə razı olmaları üçün inandırmağa çalışmaqdır", - deyə nazir müavini qeyd edib.

Xəbər lenti

Xəbər lenti