Bu gün Astanada MDB dövlətləri-iştirakçılarının vergi (maliyyə araşdırmaları orqanları rəhbərlərinin Koordinasiyası Şurasının (VAOKS) səkkizinci iclası öz işinə başlayıb. Azərbaycan Vergilər Nazirliyindən Trend ə verilən məlumata görə, iki gün ərzində şura üzvləri iqtisadi cinayətkarlıqla və korrupsiya ilə mübarizə sahəsində əməkdaşlığın səmərəliyinin artırılması məsələsini müzakirə edəcəklər.
İclasın işində Azərbaycan, Ermənistan, Belorusiya, Gürcüstan, Qırğızıstan, Moldova, Rusiya Federasiyası, Tacikistan vergi (maliyyə) araşdırmaları orqanlarının rəhbərləri, eləcə də Latviya, Litva, Estoniya və Ukraynadan müşahidəçilər iştirak edirlər.
İclasda iştirak etmək üçün Azərbaycandan Qazaxıstana Vergilər Nazirliyinin Beynəlxalq Əlaqələr İdarəsinin rəisi Bəxtiyar Əlişov və Vergi Cinayətlərinin İlkin Araşdırmaları Departamentinin rəis müavini Mahir Hümbətov yola düşüblər.
İclasın gündəliyinə korrupsiya ilə mübarizənin səmərəliyinə və iqtisadiyyatın mühüm sahələrinin dekriminallaşdırılmasına yönələn birgə profilaktik, operativ-axtarış tədbirləri və xüsusi əməliyyatların keçirilməsi məsələlərinə dair məruzələr, çıxışlar və fikir mübadiləsi daxildir. İclas zamanı həmçinin MDB ölkələrinin vergi (maliyyə) araşdırmaları orqanları əməkdaşlarının ixtisaslarının artılırması və kadr hazırlığı sahəsində əməkdaşlıq məsələləri müzakirə olunacaq.
MDB əməkdaşlığının sahə orqanlarından olan VAOKS 1999-cü ilin oktyabrında vergi (maliyyə) qanun pozuntuları ilə mübarizədə qarşılıqlı fəaliyyət və fəaliyyətlərin koordinasiyası məqsədi ilə yaradılıb. Azərbaycan, Ermənistan, Belorusiya, Gürcüstan, Qırğızıstan, Moldova, Rusiya və Tacikistan şuranın üzvləridir.