Azərbaycan "Sərbəst toplaşmaq azadlığı haqqında" qanuna texniki dəyişikliklər etməyə hazırlaşır. Trend AzTV-yə istinadən xəbər verir ki, bu barədə Prezident Aparatı hüquq-mühafizə orqanları ilə iş üzrə şöbəsinin müdiri Fuad Ələsgərov bildirib.
F.Ələsgərov qeyd edib ki, bununla bağlı Venesiya Komissiyasına da müraciət olunub: "Komissiyanın ekspertlərinin məsələ ilə bağlı rəyi hazır olduqdan sonra birgə işçi qrupu çərçivəsində qanuna əlavə və dəyişikliklər planlaşdırılıb". F.Ələsgərov sənədin Milli Məclisin payız sessiyasında müzakirəsini istisna etməyib.
F.Ələsgərov bildirib ki, qanunun əsas müddəları ilə heç bir problem yoxdur: "Qanun Avropa İnsan hüquqları konvensiyasının ,Avropa İnsan Hüquqları Məhkəməsinin tələblərinə cavab verir. Burada yalnız texniki məsələlərlə bağlı hər hansı bir dəyişiklik ola bilər".
F.Ələsgərov ictimaiyyətin müxtəlif dairələrində daha çox müzakirə olunan "Siyasi partiyalar haqqında" qanunun yenidən hazırlanmasına da münasibət bildirib. Onun fikrincə, qanuna ediləcək dəyişikliklər daha çox partiyaların maliyyə şəffaflığı məsəlsini əks etdirməlidir. Bu həm də korrupsiya ilə mübarizəyə dair dövlət proqramının tərkib hissəsidir: "Parlament seçkiləri ərəfəsində siyasi partiyaların mitinqlər təşkil etmələrinə nəzər yetirsək, hamıya məlumdur ki, müxalifət partiyalarının mitinqinə çıxarılan şəxslərə pul paylanılır. Soruşmaq lazımdır ki, maliyyə vəsaitlərini müxalifət partiyaları hansı yolla əldə ediblər".
