2006-cı ilin sonunadək Azərbaycanın Tarif Şurası Bakımetropolitenində tariflərin artırılması imkanlarını nəzərdən keçirməyi planlaşdırmır. Trend in xəbər verdiyi kimi, Şuranın sədri, iqtisadi inkişaf naziri Heydər Babayev bildirib ki, metro tarifləri hələlik müzakirə oluna bilməz. Belə ki, bunun üçün monitorinq keçirilməli və Bakmetropolitenin təsərrüfatı analiz edilməlidir.
"Metroda və avtobusda gediş haqları arasında böyük fərq var və bu, dünya təcrübəsində yolverilməzdir. Buna baxmayaraq, biz tariflərə baxılması məsələsinə 2007-ci ildə qayıdacağıq. Ancaq bir faktı da nəzərə alırıq ki, bu gün metrodan əsasən, əhalinin az təminatlı təbəqəsi istifadə edir", - deyə nazir qeyd edib.
Bununla yanaşı, H.Babayev hesab edir ki, hazırkı qiymətlərlə metroda xidmətlərin keyfiyyətini artırmaq, vaqonların təzələnməsi üçün sərmayə qoymaq və hətta metro işçilərinin əmək haqlarını ödəmək qeyri-mümkündür. Bu problemlərin həlli üçün dövlət öz büdcəsi hesabına Bakmetropolitenini subsidiyalaşdıracaq.
